आस्थाको आकार

कबिता Unknown

आस्थाको आकार
---------

-shreejan shree

अपहरण गरेर
तिम्रा यादहरुले
मलाई म बाटै छुट्याएकाछन्।
यतिखेर
केयलसीसीको उचाइबाट
सर्वोच्च सगरमाथा भन्दा अग्लो
तिम्रो त्यो भर्जिन प्रेमलाई
हिर्दय रित्याएर सलाम गर्दैछु।
.

जतिखेर छोडेको थिएँ-
मन भारी बनाएर माटो
त्यतिखेर मात्र चिनेको हुँ माटोलाई।
जतिखेर छोडेको थिएँ-
छातीमा ढुङो राखेर तिमीलाई
त्यतिखेर मात्र चिनेको हुँ यो मुटुलाई।
.

आज
पहाड जत्रो दु:खले थिचिएर
जीवन परदेश भोग्दैछ।
परदेश,
परदेश भन्नु नै आँखाको कोसी रहेछ।
परदेश भन्नु नै सुस्ता र कालापानी रहेछ।
हुम्ला र जुम्ला रहेछ।
परदेश भन्नु नै छाउपडी र बोक्सीप्रथा रहेछ।
.

ए देश मैले भेट्टाउनै सकिनँ दु:खको रङ
किन्तु दु:खका तोपहरुले छाती छियाछिया छ।
मैले भेट्टाउनै सकिनँ आस्थाको आकार
किन्तु अास्थैआस्थाले मन लछप्प भिजेको छ।
हो,
हो आमा
अपहरण गरेर
तिम्रा यादहरुले
मलाई म बाटै छुट्याएकाछन्।
र,
यतिखेर
केयलसीसीको उचाइबाट
सर्वोच्च सगरमाथा भन्दा अग्लो
तिम्रो त्यो भर्जिन प्रेमलाई
हिर्दय रित्याएर सलाम गर्दैछु।
.................