'बा'लाई सम्झिदा

कबिता Unknown

'बा'लाई सम्झिदा
-----------
-shreejan shree

बा,
अनिदा रातहरुमा
अमिलो समय कोखमा च्यापेर
जब सम्झिन्छु तँपाइलाई
समय तप्प-तप्प चुहिन्छ आँखाबाट।

बा,
जब विहारीभैया सँगै खेलौनाको दोकान आइपुग्थ्यो साइकलमा
मलाई रुवाएर जान्थ्यो दोकानले।
र म सँगै तँपाइपनि रुनुहुन्थ्यो
नदेखिनेगरी।
रपनि कताकताबाट
खेलौना आइपुग्थ्यो मेरो हातमा।
खेलौना सँगै रमाउथेँ म
र म सँगै रमाउनु हुन्थ्यो तँपाइ।

आज म परदेसिएकोछु
र म सँगै आएको छ तपाईंको करङ अनुहार/दुब्लो तस्विर
र तस्विर सँगसँगै अाएकाछन् निधारका गुचुमुचु मुजा
जहाबाट कति कूलाहरु बगे?
समय सँग हिसाव छैन शायद।
बा,
म सँगै आएकोछ तँपाइको पुरानो भोटोपनि
र भोटो सँगै आएको छ पसिनाको मिठो गन्ध।
र आज
यही भोटो र तपाइको पसिनाको गन्ध साक्षी राखेर भन्दैछु कि-
"रहर पूरा गरिने त 'बा'को कमाइले पो रहेछ
आफ्नो कमाइले त
आवश्यकता समेत पूरा गर्न नसकिने।"

जिन्दगी मैनबत्ति रहेछ 'बा'
दुइतिरबाट सल्किएको मैनबत्ति।

- श्रीजन श्री
2-sep-2014